Selma Hreggviðsdóttir & Sirra Sigrún Sigurðardóttir

Selma Hreggviðsdóttir útskrifaðist með Meistaragráðu í myndlist frá Glasgow school of Art árið 2014 og með BA gráðu frá Listaháskóla Íslands árið 2010 auk þess sem hún lauk meistaranámi í listkennslufræðum árið 2021 frá Listaháskóla Íslands. Selma var tilnefnd til Íslensku myndlistarverðlaunanna 2021 og hefur hún sýnt ötullega hér heima og víða erlendis og má þar nefna í Kling and Bang Reykjavík, Berg Contemporary Reykjavík, Civic Room Glasgó, Nýlistasafnið Reykjavík, Listasafni Akureyrar, Space 52 Aþenu og Klingental Basel. Selma hefur starfað sem stundakennari við Listaháskóla Íslands.

Sirra Sigrún Sigurðardóttir (1977) lauk BA prófi frá Listaháskóla Íslands árið 2001 og útskrifaðist með meistaragráðu frá School of Visual Arts í New York 2013. Verk Sirru eru kosmísk í eðli sínu og tengjast gjarnan vangaveltum um stöðu okkar inni í gangverki náttúrunnar, eðlisfræðinnar og þeirra afla sem halda heiminum gangandi. Þau sýna oft stöðu okkar sem einstaklinga, vægi okkar og smæð þar sem hið smáa er sett í samhengi við það stærra og merking er yfirfærð frá einu fyrirbæri yfir á annað svo úr verður ný skynjun, ný sýn.